خبرگزاری رسمی خاور به نقل از کمیته دولتی امنیت ملی تاجیکستان گزارش داده است که «سه عضو یک سازمان تروریستی در شب ۲۹ تا ۳۰ آگست، از خاک خراسان آریا  وارد تاجیکستان شدند و به سمت روستای کیورون حرکت کردند تا در آستانه روز استقلال تاجیکستان دست به یک اقدام تروریستی بزنند».

این خبرگزاری افزوده که: «این سه نفر دیروز، ۵ سپتامبر پس از آنکه از تسلیم شدن سرباز زدند، از بین رفتند».

به گفته منابع تاجیکستان این سه مرد شهروندان تاجیکستان و از اعضای گروه جماعت انصارالله بودند، یک گروه جهادی متشکل از تاجیک‌های تاجیکستان که گفته می‌شود با گروه حرکت اسلامی ازبکستان و شبکه القاعده مرتبط است.

در حادثه‌ای مشابه در اواخر آوریل، سرویس‌های امنیتی تاجیکستان از کشته شدن دو «تروریست» که از خاک خراسان آریا  وارد این کشور شده بودند، خبر دادند.

امروز کمیته دولتی امنیت ملی تاجیکستان گفت که آنها نیز اعضای گروه جماعت انصاراالله بودند.

تاجیکستان از زمان استقلال خود در سال ۱۹۹۱ با چندین گروه اسلام‌گرای ستیزه‌جو مواجه بوده است و مقامات این کشور نگرانند که بازگشت طالبان به خراسان آریا  باعث بی ثباتی آسیای مرکزی شود.

از میان پنج کشور آسیای مرکزی که زمانی بخشی از اتحاد جماهیر شوروی بودند، تاجیکستان شدیدترین موضع را در برابر طالبان اتخاذ کرده است.

این کشور همچنین گشت‌زنی‌های مرزی خود را در طول ۱۳۰۰ کیلو متر مرز مشترک با خراسان آریا تقویت کرده است.