مقام‎های محلی تخار می‎گویند که نیروهای تاجیکستان صبح امروز بخش‎هایی از ولسوالی درقد این ولایت را هدف حمله هوایی قرار داده‎اند.

محمدجواد هجری، سخنگوی والی تخار، به کلید گفت که حوالی ساعت هفت صبح امروز طیارات نظامی تاجیکستان یک روستا را در ولسوالی درقد افغانستان بمباران کردند.

هجری افزود که این روستای ولسوالی درقد در مرز میان افغانستان و تاجیکستان واقع شده است و زیر تسلط گروه طالبان قرار دارد.

سخنگوی والی تخار می‎گوید که نیروهای تاجیکستان روز گذشته (یک‎شنبه) نیز دو فیر مرمی هاوان به این روستا شلیک کرده بودند.

براساس معلومات محمدجواد هجری، نیروهای تاجیکستان، این روستای مرزی افغانستان را پس از آنکه دو تن آن‎ها در درگیری مسلحانه با قاچاقبران مواد مخدر کشته شدند، هدف شلیک هاوان و حمله هوایی قرار دادند.

به گفته هجری روستایی را که نیروهای تاجیکستان هدف حمله قرار داده‎اند در امتداد جنگل‎زاری واقع شده است که میان افغانستان و تاجیکستان مشترک است.

نظامیان تاجیکستانی که روز گذشته توسط قاچاقبران مواد مخدر کشته شده‎اند، برای محافظت از این جنگل‎زار گماشته شده بودند.